مقال

جمال علي يكتب : منتخب مصر مش عزبة محمد صلاح!

  • منتخب مصر مش محمد صلاح.. منتخب مصر أكبر من أي نجم مهما كان اسمه أو تاريخه. مفيش لاعب يملك المنتخب، ومفيش اسم فوق الحساب.
  • المدرب اللي يخاف من نجوم فريقه، ما ينفعش يقود منتخب. احترام النجوم شيء، والخضوع لهم شيء تاني تمامًا.
  • لما اللاعب يضمن مكانه مهما كان مستواه، المنافسة بتموت، والمنتخب بيدفع الثمن.
  • اللي بيلعب على المزاج، واللي بيحسبها على رجله، واللي مش عنده حمية على قميص المنتخب.. مكانه الدكة مهما كان اسمه.
  • حسام حسن كان عنده الجرأة يقعد نجوم، ويدي الفرصة لغيرهم. خلق منافسة حقيقية، وخلى اللاعب يحارب عشان يثبت نفسه، مش عشان يحافظ على مكان مضمون.
  • نجاح حسام حسن ما كانش فنيات بس.. كان شخصية، وحزم، وعدالة في الاختيار، وجرأة في القرار. ودي حاجات شفنا انعكاسها على أداء المنتخب ونتائجه.
  • علي ماهر مش مطالب يكون نسخة من حسام حسن، لكن مطلوب منه يكون صاحب قرار. اللي مش بيقدم في الملعب، لازم يخرج.. مهما كانت نجوميته.
  • محمد صلاح نجم كبير، وتاريخه لا يمكن إنكاره، لكن التاريخ مش تصريح مفتوح للعب مهما كان الأداء، والنجومية مش حصانة من النقد.
  • وبصراحة، محمد صلاح في الفترة الأخيرة أصبح جزءًا من المشكلة. مش مقبول إن المشهد يوحي وكأن المنتخب والجهاز الفني لازم يتكيفوا مع النجم، بدل ما النجم يلتزم بالمنظومة.
  • اللي حصل مع حسام حسن، وما ترتب عليه من وجهة نظري، كان خسارة كبيرة للمنتخب. خسرنا مدربًا كان عنده الجرأة يتعامل مع النجوم، ويختار اللي يستحق، ويقعد اللي مش بيقدم المطلوب.
  • مباراة مالاوي مش مجرد تعادل أو نتيجة سيئة.. دي انعكاس لحالة المنتخب. أداء باهت، غياب الروح، ولاعبون لا يقدمون ما يتناسب مع قيمة القميص اللي بيلبسوه.
  • محمد صلاح تحديدًا كان أداؤه بعيدًا تمامًا عن المنتظر. لا تأثير يُذكر، ولا أداء يليق باسم لاعب بحجم محمد صلاح. والاسم الكبير لا يبرر الأداء الصغير.
  • الغطرسة في كرة القدم لا تصنع بطولات، والنجومية لما تتحول إلى إحساس بأنك فوق المحاسبة، بتبقى بداية السقوط.
  • منتخب حسن شحاتة ما كسبش ثلاث بطولات أفريقية بالأسماء وحدها. كسب بشخصية مدرب، وعدالة، وحزم، ومجموعة كانت بتلعب من أجل مصر قبل أي شيء.
  • أنا مش فارق معايا مين النجم، ولا مين صاحب الاسم، ولا مين عنده ملايين المتابعين.. فارق معايا مين اللي يستحق يلبس قميص منتخب مصر ويقاتل من أجله.
  • منتخب مصر محتاج مدرب قوي الشخصية، ولاعبين عندهم روح، ومنافسة حقيقية. محتاج 11 لاعبًا بيلعبوا عشان مصر، مش عشان مكانهم مضمون أو نجوميتهم محفوظة.

منتخب مصر مش عزبة حد.. لا محمد صلاح ولا غيره. القميص أكبر من الأسماء، ومصر أكبر من الجميع.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى